ទឹក​ឃ្មុំ​​​អមតៈ

ទឺកឃ្មុំ (honey) គឺជាអាហារដែលគេនិយមបរិភោគជាទីបំផុត នៅជុំវិញពិភពលោកយើងនេះ។ ហើយអ្នកដែលចាត់ទុកទឹកឃ្មុំថាជាអាហាររបស់អ្នកក្រ អ្នកនោះច្បាស់ជាធុនមនុស្ស «អង្កែបក្នុងអណ្តូង» ដែលមើលមិនឃើញមេឃធំប៉ុនណាឡើយ។ តាមការពិតទៅ នៅប្រទេសណាក៏ដោយ ក៏គេចាត់ទុកទឹកឃ្មុំថាជាអាហារដ៏ចាំបាច់ និងមានរស់ជាតិជាទីបំផុត ហើយនៅក្នុងគ្រប់ភាសាទាំងអស់ គេនិយមប្រៀបធៀបអ្វីដែលគួរឲ្យស្រឡាញ់ចូលចិត្ត ទៅនឹងទឹកឃ្មុំ ដូចជាពាក្យថា «Honey, you’re so sweet!» ជាដើម ។ល។ និង ។ល។ ។

ផលិផលទឹកឃ្មុំដាក់លក់នៅតាមផ្សារទំនើប នៅសហរដ្ឋអាមេរិក

នៅសហរដ្ឋអាមេរិក ទឹកឃ្មុំគឺជាអាហារពេលព្រឹក ដែលគេបរិភោគរាល់ថ្ងៃជាមួយនឹងនំអំបែង ដែលភាសាអង់គ្លេសហៅថា pancake ។ លើសពីនេះទៀត ទឹកឃ្មុំក៏ត្រូវគេយកទៅប្រើជំនួសស្ករ នៅក្នុងការធ្វើនំថ្លៃៗជាច្រើនមុខទៀតដែរ។ ហើយនៅតាមហាងម្ហូបអាហារណាក៏ដោយ ក៏មានទឹកឃ្មុំសម្រាប់យើងដែរ។ ដូចនេះ ទឹកឃ្មុំជាអាហារដ៏សំខាន់បំផុតសម្រាប់ជនជាតិអាមេរិកាំង។

នំអំបែងជាមួយទឺកឃ្មុំ (pancake) ជាអាហារពេលព្រឹករបស់ជនជាតិអាមេរិកាំង

ដោយឡែក នៅប្រទេសកម្ពុជាយើង ទឹកឃ្មុំគឺជាផលិតផលរបស់ប្រជាកសិករយើង នៅតាមតំបន់ជនបទនានានៅទូទាំងប្រទេស។ ដូចនេះ បើសិនជាយើងនាំគ្នាបរិភោគទឹកឃ្មុំឲ្យបានកាន់តែច្រើន ប្រាក់ចំណូលរបស់ប្រជាកសិករយើង នឹងកាន់តែកើនឡើងច្រើនឡើងថែមទៀត។

ទន្ទឹមនឹងនេះដែរ ការប្តូររបៀបយកឃ្មុំរបស់ប្រជាកសិករយើង ពីការយកឃ្មុំដោយកាប់យកមែកឈើដែលជាបង្គង មកជាការយកឃ្មុំដោយកោសយកតែក្បាលទឹក គឺជារបកគំឃើញដ៏អស្ចារ្យមួយ ប្រចាំសតវត្សទី ២១ យើងនេះ (discovery of the century) ។ ខ្ញុំបាទហ៊ាននិយាយដូច្នេះ ពីព្រោះការយកឃ្មុំដោយកោសយកតែក្បាលទឹក គឺជាប្រការដែលផ្តល់លទ្ធភាពឲ្យមេឃ្មុំអាចបង្កើតឡើងវិញនូវក្បាលទឺកថ្មីមួយទៀត។ ដូចនេះការយកឃ្មុំដោយកោសយកតែក្បាលទឹក គឺជាការដែលធ្វើឲ្យទឹកឃ្មុំមានជីវិតអមតៈ ព្រោះបន្ទាប់ពីការកោសយកក្បាលទឹករួចមក មេឃ្មុំនឹងបង្កើតក្បាលទឹកមួយថ្មីទៀតឡើងវិញជារៀងរហូត។ យើងអាចនិយាយបានម៉្យាងទៀតថា ការយកឃ្មុំដោយកោសយកតែក្បាលទឹក គឺជាការចិញ្ចឹមឃ្មុំបែបធម្មជាតិ៕